اسلام آباد۔17اپریل(اے پی پی)وزیرِ اعظم محمد شہباز شریف سمگلنگ اچ ملوث لوکاں دے خلاف فوری کارروائیان کرݨ دی ہدایت کریندے آکھیے جو ملکی معاشی صورتحال سمگلنگ ڄھیں لعنت کوں نئیں سہار سڳدی، ذخیرہ اندوزی اتے سمگلنگ دے گوداماں دے خلاف فوری کارروائی کیتی ونڄے اتے ملک کوں ارباں ڈالر دا نقصان پچاوݨ آلیاں کوں سخت سزا ݙتی ونڄے۔ اے ڳالھ انہاں اسلام آباد اچ اعلیٰ سطح جائزہ اجلاس نال خطاب اچ آکھی۔ اجلاس اچ کھنݙ، کݨک، اٹے اتے یوریا دی سمگلنگ روکݨ کیتے اقدامات دا جائزہ ڳھدا ڳئے۔ اجلاس اچ ایف بی آر، وزارت داخلہ و قانون نافذ کرݨ آلے اداریاں ولوں صوبیاں وچال اتے ملک توں ٻاھرو سمگلنگ روکݨ دے اقدامات ݙسائے ڳئے۔ وزیرِ اعظم بیرون ملک سمگلنگ روکݨ اتے ضلع توں ضلع ذخیرہ اندوزی روکݨ کیتے نگرانی مراکز اتے چیک پوسٹاں کوںو دھ فعال کرݨ دی ہدایت کیتی جو سپارکو کوں ملکی سرحداں دی رئیل ٹائم سیٹلائٹ امیجری اتے آمدورفت دا ڈیٹا ݙتا ونڄے، ایں سانڳے سمگلنگ روکݨ کیتے ٹریک اینڈ ٹریس سسٹم نال ڈیلراں اتے سہولت کاراں کوں پکڑیا ونڄے۔
