اسلام آباد۔24مئی (اے پی پی) وزیر داخلہ رانا ثناءاللہ خان آکھیے جو بے گناہ پولیس اہلکار کمال احمد دے سینے اچ لڳی گولی ثبوت اے جو عمران خان دہشت گرد اے ،کمال احمد دے قاتل عمران خان، شیخ رشید اتے انہاں دے حواری ہن ،عمران خان مارچ دی آڑ اچ ملک اچ خانہ جنگی دی سازش کریندے پئن ۔ منڳل کوں وزارت داخلہ توں جاری بیان موجب انہاں آکھیے جو ‘خونی مارچ ہوسی’ دے اعلانات کرݨ آلیں توں حساب گھنسوں ۔ پولیس تے فائرنگ توں اے ڳالھ ثابت تھی ڳئی اے جو اے سیاسی سرگرمی کائنی تے اے پرامن مارچ چاہندے ہی کائناں ہن ۔مندے کڈھݨ آلیں گولیاں وساوݨ شروع کرݙتن ، قانون کوں ہتھ اچ ڳھدا ڳئے ۔ کمال احمد دے قاتلاں کوں قانون دی کچاری اچ کھڑا کریسوں ، انہاں آکھیے ملک اچ خانہ جنگی، افراتفری ، فساد اتے انتشار کوں قانونی رستے نال روکیسوں ۔ شہید پولیس اہلکار دے اہل خانہ کوں شہدا پیکج ݙیسوں ، شہید اہلکار دے اہل خانہ دی کفالت اتے ٻالاں دی تعلیم دی ذمے واری حکومت گھنسی ۔عوام دے جان ومال دی حفاظت دا فرض پورا کریسوں ۔ وزیر داخلہ شہید پولیس اہلکار دے اہل خانہ نال دلی تعزیت اتے ہمدردی دا اظہار کیتے۔ انہاں دعا کیتی جو اللہ تعالی شہید دے درجات اچے کرے ، اہل خانہ کوں صبر ݙیوے ۔
