اسلام آباد۔20مارچ (اے پی پی) وزیراعظم عمران خان آکھیا جو ریکوڈک معاہدے نال بلوچستان اچ وݙے پیمانے تے سرمایہ کاری شروع، صوبے اچ عام شہریاں دا معیار زندگی بدل ویسی۔ وزیراعظم میڈیا آفس توں جاری بیان دے مطابق وزیراعظم عمران خان اتوار کوں چاغی اچ تانبے اتے سونے دی کاناں دی ترقی بارے ٹیتھیان کاپر کمپنی (ٹی سی سی) نال وݙے عرصے توں جاری ریکوڈک تنازعے کوں کامیابی نال حل کرݨ دے بعد حکومت پاکستان، حکومت بلوچستان اتےکینیڈا دی بیرک گولڈکارپوریشن وچال تھیوݨ آلے معاہدے تے دستخط تھیوݨ دی تقریب اچ شرکت کیتی۔ نویں معاہدے تے اتوارکوں وفاقی اتے بلوچستان حکومت دے نمائندے اتے بیرک گولڈ دے چیف ایگزیکٹو ڈاکٹر مارک برسٹو دی قیادت اچ وفد دستخط کیتی۔ نویں معاہدے دے شرطاں دے مطابق بیرک گولڈ کمپنی ریکوڈک منصوبہ پاکستانی اداریاں نال شراکت اچ بحال اتے تیارکریسی۔ منصوبے اچ بیرک گولڈکمپنی دا 50 فیصد حصہ ہوسی۔ باقی پنجاہ فیصد پاکستان دی ملکیت ہوسی ۔ معاہدے دے تحت وفاقی حکومت دی 25 فیصدحصہ داری کوں وفاقی حکومت دے ترائے سرکاری کاروباری اداریاں (ایس اوایز) آئل اینڈ گیس ڈویلپمنٹ کارپوریشن لمیٹڈ (اوجی ڈی سی ایل)، پاکستان پیٹرولیم لمیٹڈ (پی پی ایل) اتے گورنمنٹ ہولڈنگز پاکستان لمیٹڈ (جی ایچ پی ایل) اچ ہکو سواں ونڈیا ویسی۔ منصوبے کوں اڳوں ودھاوݨ بارے بلوچستان اچ تقریباً ݙاہ ارب ڈالر دی سرمایہ کاری کیتی ویسی۔ معاہدے نال سرمایہ کاری نال اٹھ ہزار توں ودھ نویں ملازمتاں پیداتھیسن۔ ریکوڈک منصوبہ دنیا اچ تانبے اتے سونے دی کان کنی دے ساریاں توں وݙے منصوبیاں اچوں ہک ہوسی۔ اےمعاہدہ گزریل ترائے سالیں اچ ڳالھ مہاڑ دے کئی دور دے بعد طے تھیے۔ اگست 2019 اچ وزیر اعظم عمران خان معدنیات دی کاناں دی جلدی ترقی دے مقاصد دے تحت مذاکرات کوں اڳوں ودھاوݨ بارے ہک کمیٹی ٻݨائی۔ وزیراعظم ایں موقع تے ڳالھ مہاڑ کریندیں ہوئیں آکھیا جو ریکوڈک معاہدے نال بلوچستان اچ وݙے پیمانے تے سرمایہ کاری شروع، صوبے اچ عام شہریاں دا معیار زندگی بدل ویسی۔ ایں توں پہلے وزیراعظم عمران خان نال بیرک گولڈ کارپوریشن دے وفد ملاقات کیتی۔ پاکستان اچ کینیڈا دی ہائی کمشنر وینڈی گلمور وی ایں موقع تے موجود ہن۔
