استنبول۔25نومبر (اے پی پی) وزیراعظم محمد شہباز شریف ترکیہ دے صدر رجب طیب اردوان دے رَلے جمعے کوں پاک بحریہ کیتے چارملجم کارویٹ جہازاں اچوں تریجھے جہاز پی این ایس خیبر دا افتتاح کر ݙتے جیڑھا جو پاک۔ترکیہ سٹرٹیجک پارٹنرشپ اچ اہن سنگ میل رکھیندے۔ وزیراعظم محمد شہباز شریف آکھیا جو پاکستان اتے ترکیہ وچال ڳھاٹے تاریخی تعلقات ہن جیڑھے ویلھے نال مضبوط تھیندے پن۔ پاکستان اتے ترکیہ رَل تے ترقی دا پندھ کریندے رہسن۔ وزیراعظم محمد شہباز شریف صدر رجب طیب اردوان دی دعوت تے ترکیہ دے ݙو ݙینھ دے دورے تے ہن۔ استنبول شپ یارڈ اچ پی این ایس خیبر لانچنگ تقریب اچ وفاقی وزیر اطلاعات تے نشریات مریم اورنگزیب، وفاقی وزیر تجارت سید نوید قمر، وفاقی وزیر دفاعی پیداوار اسرار ترین وی موجود ہن۔ تقریب اچ ݙوہیں ملکاں دے قومی ترانے وڄائے ڳے، شپ یارڈ آوݨ تے وزیراعظم محمد شہباز شریف کوں گارڈ آف آنر پیش کیتا ڳے۔ وزیراعظم محمد شہباز شریف تقریب توں خطاب کریندیں ہوئیں آکھیا جو ݙوجھے گھر ترکیہ دا ولا دورہ کرݨ تے خوش آں، اڄ دا ݙینھ ݙوہیں ملکاں وچال تاریخی تعلقات اچ عظیم ݙینھ اے، پاکستان اتے ترکیہ وچال ڳھاٹے تعلقات ہن۔ انہاں آکھیا جو پاکستان اتے ترکیہ ہر اوکھ اچ ہک ݙوجھے نال تھین، ترکیہ ہر عالمی فورم تے پاکستان نال تھیے۔ انہاں آکھیا جو صدر رجب طیب اردوان ہک دور اندیشن رہنما ہن، انہاں دی قیادت اچ ترکیہ جدید فلاحی ریاست ٻݨ ڳے، ترکیہ دے پرے دے علاقیاں کوں ساری بنیادی سہولتاں ہن۔ وزیراعظم آکھیا جو تساں امن نال رہݨ چاہندوں تاں تساکوں جنگ کیتے وی تیار رہوݨا پوسی، اڄ دنیا کوں کئی تنازعیاں دا سامݨا اے۔ انہاں آکھیا جو روس اتے یوکرین وچال کنڑک برآمد کرݨ معہادے اچ ترکیہ دا اہم کردار اے۔ دنیا وانڳ پاکستان کوں وی توانائی دی ڳھٹکی اے، پاکستان قابل تجدید توانائی اتے سستے ذرائع کیتے کم کریندا پے۔ انہاں آکھیا جو ترکیہ دے سرمایہ کاراں کوں پاکستان اچ سرمایہ کاری دی دعوت اے۔ پاکستان اتے ترکیہ کوں قابل تجدید توانائی ذرائئ کیتے رَل تے کم کرݨا چاہیدے۔ ݙوہیں ملک آلودگی اچ ڳھٹکی کیتے وی رَل تے کم کرسڳدن۔ وزیراعظم آکھیا جو پاکستان کوں گزریل ݙینھاں بدترین چھل دا سامݨا کرݨا پئے، ترکیہ پاکستان دی پوری مدد کیتی اے۔ ترکیہ توں 15 طیارے امدادی سامان چاتے پڄے۔ وزیراعظم جہاز دی تیاری اچ حصہ پاوݨ آلیاں کوں خراج تحسین پیش کیتا۔ ترکیہ دے صدر رجب طیب اردوان خطاب کریندیں ہوئیں آکھیا جو پاک ترکیہ ماہرین ملجم منصوبہ اچ اہم کردار ادا کریندے پن۔ پاکستان اتےترکیہ وچال برادرانہ تعلقات ہن۔ انہاں آکھیا جو ترکیہ پاکستان دے چھل متاثرہ بھراواں دی مدد کیتی اے۔ انہاں آکھیا جو ݙوپاسہ دفاعی تعاون آپسی تعلقات دا اہم ستون اے۔ پاکستان اتے ترکیہ دہشت گردی مکاوݨ کیتے کٹھے ہن۔ دہشت گرداں دے خلاف زیروٹالرنس دی پالیسی تے ٹردے پیوں۔ وفاقی وزیر دفاعی پیداوار اسرار ترین آکھیا جو پی این ایس خیبر دی لانچنگ تقریب خوش آئند اے، پاک۔ترکیہ تعاون نال دفاعی تعلقات ٻئے مضبوط تھیسن۔ پی این ایس خیبر نال پاک بحریہ دی دفاعی صلاحیت ودھسی۔ انہاں آکھیا جو اساں دہشت گردی سودھے سارے چیلنجز نال نبڑݨ کیتے نال کھڑوں۔ ترکیہ کشمیر دے مسئلے تے ہمیشہ پاکستان نال تھیے۔ پاک بحریہ دے سربراہ ایڈمرل محمد امجد خان نیازی تقریب توں خطاب کریندیں ہوئیں آکھیا جو پاکستان اتے ترکیہ وچال مضبوط دفاعی تعلقات ہن جیڑھے ہر ݙینھ مضبوط تھیندے پئن۔ تریجھے پی این ایس خیبردی لانچنگ نال پاکستان دا دفاع مضبوط تھیسی۔ بحری دفاع تے تعاون کرݨ تے ترکیہ دی قیادت دا شکریہ ادا کریندوں۔
