اسلام آباد۔7ستمبر (اے پی پی):وزیراعظم محمد شہباز شریف وݙی قیمت دے غیرملکی تحفے آپݨے آپ کنے رکھݨ دی بجائے توشہ خانہ اچ جمع کراوݨ دی منفرد روایت اتے مثال قائم کریندے ہوئیں ہدایت کیتی اے جو اے تحئفے مستقل طور تے وزیراعظم ہائوس اچ رکھیے ونڄن تاں جو عوام دوست ملکاں دی پاکستان نال محبت دا پتہ لڳے، ایں مقصد کیتے وزیراعظم ہائوس اچ جاہ بݨائی ونجے، سرکاری ذرائع ،موجب وزیراعظم شہبازشریف پاکستان دی تاریخ اچ ھک منفرد مثال تے وزیراعظم ہاؤس اچ ھک نویں روایت قائم کیتی اے ہدایت کیتی اے جو وزیراعظم کوں ملݨ آلے غیرملکی تحفے مستقل طور تے وزیراعظم ہاؤس اچ رکھیے ونڄن ، وزیراعظم شہباز شریف ہدایت کیتی جو غیر ملکی تحفے عوام کوں ݙکھالݨ دا اہتمام کیتا ونڄے تاں جو عوام دوست ملکاں دی پاکستان نال محبت دا انہاں کوں پتہ لڳے ۔ وزیراعظم شہباز شریف دی ہدایت تے وزیراعظم ہاؤس اچ جاہ بݨا ݙتی ڳئی اے، سرکاری ذرائع موجب وزیراعظم ٻاہرلے ملکاں توں ملݨ آلے تحئفے سرکاری خزانے اچ جمع کرا ݙتن ۔ توشہ خانے اچ جمع کرائے ڳئے تحفے دی مالیت 27 کروڑ روپے اے۔ وزیراعظم کوں اے قیمتی تحفے خلیجی ملکاں دے دوریں ویلھے ملئے ہن ۔ تحفے اچ ہیرے جڑیاں ݙو قیمتی گھڑیاں وی ہن۔ ھک گھڑی دی مالیت 10 کروڑ اتے ݙوجھی دی قیمت 17 کروڑ ݙسائی ڳئی اے ۔سرکاری ذرائع موجب خلیجی ریاستاں دی طرفوں وزیراعظم شہباز شریف کوں سابق وزیراعظم عمران خان دے مقابلے اچ زیادہ مہانگے تحفے ݙتے ڳئن تاں جو وزیراعظم گھڑیاں، قیمتی قلم، مندری، ‘کف لنک (بٹن)، اتے خوشبوسودھے سارے وݙی قیمت آلے تحفے توشہ خانے اچ جمع کرا ݙتن ۔ ذرائع موجب شہباز شریف بطور وزیر اعلی پنجاب اپݨے ݙاہ سالہ دور اچ ملݨ آلے سارے غیرملکی تحفے توشہ خانے اچ جمع کرویندے رہ ڳئن ۔
