لاہور۔5نومبر (اے پی پی) وزیراعظم محمد شہبازشریف آکھیا جو فل کورٹ کمیشن عمران خان تے حملے دی تحقیقات کرے ، کمیشن ٻݨاوݨ کیتے جلدی چیف جسٹس کوں خط لکھساں۔عمران خان سودھے سارے زخمیاں دی جلدی صحت یابی کیتے دعا کرینداں۔ واقعے دے بعد الزام تراشیاں کرݨ افسوسناک اے۔ کوڑ اتے پروپیگنڈے نال عوام کوں گمراہ کرݨ دی کوشش کیتی ویندی پی اے۔ عمران خان پتھر دل بندہ اے جئیں کوں ٻے کہیں دا احساس کائنی۔ چھݨ چھݨ کوں ماڈل ٹاؤن اچ پریس کانفرنس کریندیں ہوئیں انہاں آکھیا جو پی ٹی آئی دے لانگ مارچ اچ تھیوݨ آلے واقعے دی اساں مذمت کیتی اے۔ گزریل ݙینھ بدقسمتی نال افسوسناک واقعے تھیے۔ وزارت داخلہ کوں معاملے فی تحقیقات دی فوری ہدایت کیتی اے۔ افسوسناک واقعے دے بعد میں آپݨی پریس کانفرنس ملتوی کر ݙتی ہئی۔ فائرنگ اچ جاں بھق تھیوݨ آلے کارکن دی اللہ تعالیٰ مغفرت فرماوے۔ اداریاں تے الزام لاوݨ دا سلسلہ بند تھیوݨا چاہیدے۔ انہاں آکھیا جو ݙینھ رات کوڑ مارݨ آلا بندہ پاکستان دی فوج تے حملہ کریندا پے، عوام نال کوڑ مارݨ دا سلسلہ بند تھیوݨا چاہیدے۔ ادارے دے خلاف سوشل میڈیا تے مذموم مہم چلائی ویندی پی اے۔ اداریاں تے الزام لا تے دشمن دا ایجنڈا پورا کیتا ویندا پے۔ میں تے کوڑے مقدمے پچھلی حکومت ٻݨائے ہن۔ انہاں آکھیا جو طیبہ گل کوں وزیراعظم ہاؤس اچ حبس بے جا اچ رکھیا ڳیا۔ عمران خان آپݨے دور اچ اداریاں کوں بلیک میل کرݨ دی کوشش کیتی۔ عمران نیازی اساں تے لاتے الزام ثابت نہ کر سڳیا۔ نیشنل کرائم ایجنسی میکوں بے گناہ قرار ݙتے۔ پنجاب حکومت وزیرآباد واقعے دی تحقیقات کراوے۔ 22 کروڑ عوام دا فائدہ آپݨی ذات کیتے قربان نی کر سڳدا۔ عمران خان سیاسی مخالفین دے خلاف مذہب کارڈ استعمال کیتے۔ انہاں آکھیا جو جاں بحق تھیوݨ آلے کارکن دا اڄاں تئیں پوسٹ مارٹم کیوں نی تھیا۔ لانگ مارچ دی سکیورٹی دی ذمہ واری پنجاب حکومت دی ہئی۔ عمران خان آپݨے قتل دی سازش دے ثبوت عوام دے سامھے رکھے۔ انہاں آکھیا جو فل کورٹ کمیشن عمران خان تے حملے دی تحقیقات کرے ، کمیشن ٻݨاوݨ کیتے جلدی چیف جسٹس کوں خط لکھساں۔
