اسلام آباد۔15ستمبر(اے پی پی) وزیراعظم محمد شہبازشریف اوزون تہہ دے تحفظ سانڳے اپݨی کوششاں دے جائزے اتے انھاں کوں جاری رکھݨ دا آپݨا عزم کریندے آکھیے پاکستان عالمی برادری دے اوزون تہہ توں بچݨ سانڳے بین الاقوامی اقدامات اچ کلیدی کردارنبھائے۔ وزیر اعظم آفس دے پریس ونگ موجب اے ڳالھ وزیراعظم اوزون تہہ دے تحفظ دے جڳ ݙیھاڑ ݙینھ تے آپݨے سنھیے اچ آکھی اے، انھاں آکھیے بدقسمتی نال اوزون تہہ کوں انسانی سرگرمیاں شدید متاثر کیتے اتے ایندے اچ شگاف دا باعث بݨئن ۔ انہاں آکھیے جو اوزون تہہ اچ شگاف انساناں سودھے کرہ ارض تے موجود ہر جاندار کوں خطرے توں ݙوچار کرݙتے تاں جو اقوام متحدہ دے تحت ویانا کنونشن اتے مونٹریال پروٹوکول دے ذریعے عالمی کوششاں دے نتیجے اچ اوزون تہہ اچ شگاف کوں کافی حد تئیں گھٹ کرݨ اچ کامیابی حوصلے دی ڳالھ اے۔ پاکستان عالمی برادری دے اوزون تہہ توں بچݨ سانڳے بین الاقوامی اقدامات اچ کلیدی کردارنبھائے ۔ پاکستان 1992 اچ مونٹریال پروٹوکول دی توثیق کیتی جیڑھا جو اوزون تہہ کوں ختم کرݨ آلے کیمیائی مادیں (او ڈی ایس) کوں مرحلہ وار ختم کرݨ دے ساݙے عزم کوں ظاہر کریندے ، انھاں آکھیے پاکستان ایں حوالے نال نظر آوݨ آلے سنگ میل پار کیتن ، اوزون تہہ دے تحفط دے اقدامات دے تسلسل کوں جاری رکھݨ سانڳے حکومت پاکستان 1996 اچ خصوصی طور تے ھک نیشنل اوزون یونٹ (این او یو) بݨائے، ایں یونٹ دے تحت پاکستان کسٹمز، ریفریجریشن و ایئر کنڈیشننگ انڈسٹری، وزارت تجارت، تکنیکی ماہرین و انجینئرز، درآمد کنندگان اتے تاجراں نال آپݨی سانجھیاں کوششاں دے ذریعے مونٹریال پروٹوکول دے 11 مرحلے کامیابی نال مکمل کیتے ڳئن ۔ پاکستان 2009 تئیں اوزون تہہ کوں متاثر کرݨ آلے کیمیائی مادیں دی پہلی قسم کوں مرحلہ وار ختم کرݙتے جنوری 2020 تئیں ایچ سی ایف سی اچ 50 فیصد کمی دا ہدف گھن ڳھدے ۔وزیراعظم آکھیے ایندے نال نال اساں 2025تئیں آپݨی ٻہوں صنعتاں کوں اوزون دوست ٹیکنالوجیز تے منتقل کرتے 67.5 فیصد گھٹاوݨ دا ہدف پورا کرݨ دے رستے تے ٹردے پیوں ۔ وزیراعظم آکھیے ماحولیاتی تحفظ تئیں ساݙا اجتماعی عزم بھرپور طریقے نال جاری اے کیوں جو اساں کیگالی ترمیم دے تحت آوݨ آلے ایچ ایف سی فیز ڈاؤن سانڳے تیار ہیسے۔ میں ایں موقع تے ماحولیاتی تحفظ سانڳے جاری سانجھے اقدامات سانڳے اپݨی حکومت دےغیرمتزلزل عزم دا اعادہ کرینداں ، اوزون تہہ دے تحفظ سانڳے ساݙی اجتماعی کوششاں ماحولیاتی تحفظ سانڳے ساݙی ذمہ واری تے پائیدار ترقی سانڳے ساݙے جذبے دی عکاسی کریندن ۔ وزیراعظم زور ݙتے آؤ اساں اڄوکے سال دے موضوع ’’ مونٹریال پروٹوکول ۔ایڈوانسنگ کلائمیٹ ایکشنز‘‘دے تحت آندیاں نسلاں سانڳے کرہ ارض دی حفاظت دی خاطرآپݨی متحدہ کوششاں جاری رکھݨ دا عزم کروں
