اسلام آباد۔1جنوری (اے پی پی) پاکستان اتے بھارت وچال ہک ٻئے دی تحویل اچ قیدیاں دی فہرست دا تبادلہ کیتے۔ ترجمان دفتر خارجہ توں جاری بیان موجب فہرستاں دا تبالہ 2008 دے قونصلر رسائی دے معاہدے دے تحت تھیے۔ معاہدے دے تحت ݙوہیں ملکاں کوں ہر سال یکم جنوری اتے یکم جولائی کوں ہک ݙوجھے دی قید اچ فہرستاں دا تبادلہ کرݨا پوندے۔ بیان موجب حکومت پاکستان پاکستان اچ قید 231 بھارتی قیدیاں (47 سویلین قیدی اتے 184 ماہی گیراں) دی فہرست اسلام آباد اچ بھارتی ہائی کمیشن دے نمائندے دے حوالے کیتی اے۔ بھارتی حکومت بھارتی جیلاں اچ قید پاکستانیاں دی فہرست پاکستانی ہائی کمیشن نئی دہلی دے ہک افسر نال شیئر کیتی اے۔ فہرست موجب بھارت دی جیلاں اچ 418 پاکستانی (337 شہری قیدی اتے 81 ماہی گیر)قید ہن۔
