اسلام آباد۔14نومبر (اے پی پی) وزیر مملکت برائے امور خارجہ حنا ربانی کھر آکھیا جو پاکستان یورپی یونین نال مستقبل اچ تعاون ودھاوݨ چاہندے۔ پاکستان کنے یورپی ملکاں کیتے افرادی قوت ݙیوݨ کیتے بہترین امکانات موجود ہن۔ غیر قانونی ٻاہرلے ملک ونجݨ آلیاں دے خلاف سخت اقدامات کریندے پیوں۔ اے ڳالھیں انہاں سنوار کوں وزارت خارجہ اچ یورپی یونین دی کمشنر برائے مائیگریشن اینڈ ہوم افیئرز یلوا جوہانسن دے رلے سانجھی پریس کانفرنس توں خطاب کریندیں ہوئیں آکھی۔ وزیر مملکت برائے امور خارجہ آکھیا جو قانونی طور تے ٻاہرلے ملک ونجݨ آلیاں کیتے سوکھ پیدا کرݨ دی کوششاں جاری ہن۔ غیر قانونی ہجرت روکݨ کیتے وی قانون سازی کریندے پیوں۔ ایں موقع تے یورپی یونین دی کمشنر برائے مائیگریشن اینڈ ہوم افیئرز یلوا جوہانسن آکھیا جو پاکستان یورپی یونین کیتے اہم اتے تزویراتی سانجھے دار اے۔ اساں پاکستان نال رَل تے ٻہوں شعبیاں اچ کم کر سڳدوں۔ ہنرمند افرادی قوت دی یورپی ملکاں تئیں رسائی سوکھی ٻݨاوݨ دی لوڑھ اے۔ انہاں آکھیا جو انسداد دہشت گردی اچ پاکستان دی خدمات قابل تعریف ہن۔ مہاجرین بارے پاکستان اتے یورپی یونین وچال تعاون موجود اے۔
