اسلام آباد۔7جون (اے پی پی) وفاقی وزرا مولانا اسعد محمود اتے قمر زمان کائرہ آکھیا جو پٹرول تے مستحق لوکاں کوں ٹارگٹڈ سبسڈی ݙیسوں، اوکھے ویلھے توں نکلݨ کیتے غیرمقبوض اتے اوکھے فیصلے کرݨے پوسن، ایں ویلھے ہنگامی بنیاداں تے طویل المدتی معاشی طور تے کم تھیندا پئے، بے نظیر انکم سپورٹ پروگرام دے ڈیٹا تے 90 لکھ لوکاں کوں ٹارگٹڈ سبسڈی ݙیسوں اتے ایں اچ سٹھ لکھ بئے ودھیسوں۔ اے ڳالھیں انہاں منگل کوں وفاقی کابینہ دے اجلاس دے بعد وفاقی وزیر اطلاعات تے نشریات مریم اورنگزیب دے رَلے پریس کانفرنس توں خطاب کریندیں ہوئیں آکھی۔ انہاں آکھیا جو وفاقی کابینہ جیڑھے فیلے کیتے اے ہنگامی منصوبہ بندی دے تحت کیتے ڳئن ایں اچ ردوبدل وی کیتا ونڄ سڳدے۔ وزیراعظم دے مشیر برائے امور کشمیر تے گلگت بلتستان قمر زمان کائرہ آکھیا جو حکومت پٹرول تے ٹارگٹڈ سبسڈی آلے پاسے امدی پئی اے، اے نی تھی سڳدا جو ہک موٹرسائیکل آلے کوں سبسڈی ݙتی ونڄے تاں ہک لینڈ کروزر آلا وی اوہو سبسڈی ڳھنے۔ ایں موقع تے وفاقی وزیر برائے انفارمیشن ٹیکنالوجی امین الحق وی موجود ہن۔
