لاہور۔17نومبر(اے پی پی) لاہور ہائیکورٹ پورے شہر اچ گھٹ عمر تے بغیر لائسنس گاݙی اتے موٹر سائیکل چلاوݨ آلیں کوں وختی گرفتار کرݨ دا حکم ݙے ݙتے ، عدالت نشاندہی کیتی جے روݙ تے ݙاہ لکھ ڳاݙیاں چلدن تاں ݙو لکھ لوکاں دا لائسنس بݨیا ہوسی ۔ جسٹس علی ضیا باجوہ گھٹ عمر ملزم افنان شفقت دی درخواست تے سماعت کیتی،جیں اچ ڈیفنس کار حادثہ اچ ھکے خاندان دے چھی لوکاں دی ہلاکت تے قتل دی دفعات شامل کرݨ دے اقدام کوں چیلنج کیتا ڳئے ۔ سماعت ویلھے عدالتی حکم تے سی ٹی او لاہور اتے ایس ایس پی آپریشن عدالت اچ پیش تھئن ۔ سی ٹی او لاہور عدالت کوں ݙسایا جو 73 لکھ گاݙیاں روڈ تے چلدیاں پئن ،مگر لائسنس صرف 13 لکھ کنے ہے ،جیں تے عدالت حیرانگی کریندے ہوئیں آکھیے جو اے تاں ٻہوں وݙا فرق اے ،ٹریفک پولیس ایں حوالے نال کیا کریندی پئی اے ؟انہاں آکھیے عدالت کوں ݙسایا وںجے جو لائسنس دے بغیر گاݙی چلاوݨ کیڑھا جرم بݨدے ، سی ٹی او لاہور موقف اختیار کیتے اساں آپݨے لائسنس سنٹر 6 توں ودھا تے 30 کرݙتن ،عدالت کوں ݙسایا ڳئے جو ڈیفنس حادثے دے بعد 988 لوکاں کوں گرفتار کیتا ڳئے ،سی ٹی او لاہور عدالت کوں ݙسائے شہر دیاں نوے جہیں تے اساں صرف لوکاں دے لائسنس چیک کریندے پیوں،3 سنٹرز کوں 24 گھنٹے سانڳے کھول ݙتا ڳئے ، عدالت ریمارکس ݙتن جو اے جرم زیادہ تر پوش علاقیں اچ تھیندا پئے ،عدالت سی ٹی او توں پچھے انہاں لوکاں دا کیا اے جیڑھے آپݨے ٻالاں کوں ڳاݙیاں ݙیندن ؟ سی ٹی او لاہور ݙسائے اے قانون دے مطابق جرم اے،عدالت باور کرائے ایندے اچ ایکسائز ڈیپارٹمنٹ کوں وی نوٹس کیتا ونڄݨا چاہیدے ،بغیر لائسنس دے گاݙی ایکسائز اچ رجسٹرڈ نی تھی سڳدی ،وکیل درخواست گزار دا موقف ہئی جو ملزم کوں گرفتار کیتا ڳئے تے 302 دی دفعہ لا ݙتی ڳئی ،عدالت یا ݙیوائے جے 780 A لڳی اے تاں ݙو رکنی بینچ کوں اینکوں سݨݨا چاہیدے ،عدالت ریمارکس ݙتن جیڑھے لوک بغیر لائسنس موٹر سائیکل چلیندے پئن انہاں کوں گرفتار کیتا ونڄݨا چاہیدے ،اے ایکشن وختی طور تے ہووݨا چاہیدے ،عدالت واضح کیتے اساں سارے ایں ڳالھ تے متفق ہیسے جو بغیر لائسنس گاݙی چلاوݨ آلیں دے خلاف ایکشن ہووݨا چاہیدے ۔
