اسلام آباد۔13اکتوبر (اے پی پی) وفاقی وزیر بجلی خرم دستگیر آکھیا جو جنوبی ٹرانسمیشن سسٹم اچ خرابی پاروں کئی پاور پلانٹس ٹرپ کرݨ نال بجلی دی ترسیل اچ رکاوٹ آئی اے۔ بریک ڈائون نال 8ہزارمیگاواٹ بجلی سسٹم توں نکل ڳئی اے، پنج ہزار میگاواٹ کوں ولا سسٹم اچ واپس ڳھن آئیسے۔ پنج سو کے وی دی ݙو ٹرانسمیشن لائناں اچ کٹھی خرابی حیرانی دی ڳالھ اے۔ انکوائری ٹیم چار ݙینھ اچ آپݨی رپورٹ پیش کر ݙیسی۔ جتھ تکنیکی خرابی تھئی اے بحالی دا کم کریندے پیوں۔ متاثرہ علاقیاں اچ اڄ شام تئیں بجلی بحال کر ݙتی ویسی۔ خمیس کوں پریس کانفرنس توں خطاب کریندیں ہوئین انہاں آکھیاجو سویلے نو وڄے تے 16 منٹس تے کراچی توں جنوب اچ 500 کےوی دی 2 ٹرانسمیشن لائناں اچ خرابی پیدا تھئی جئیں پاروں ملک دے جنوبی حصیاں اچ بلیک آؤٹ تھیا۔
