اسلام آباد ۔ 15 مئی (اے پی پی) معاون خصوصی صحت ڈاکٹر ظفر مرزاحکومت ولوں ہیلتھ ورکرز دی حفاظت اتے حوصلہ افزائی کیتے نواں پروگرام جاری کرڈتے۔ایں موقع تے افتتاحی تقریب نال خطاب اچ ڈاکٹر ظفر مرزاآکھیے جو کورونا وائرس دی وبا اچ کم کرنڑ کیتے اوکھ سانگے ہیلتھ کئیر ورکرزکیتے ذاتی حفاظتی ساز و سامان (پی پی ای) دے معیاری استعمال کیتے ہک خصوصی آن لائن تربیتی کورس ڈیزائن کیتا گئے،جیندے اچ ہک لکھ ڈاکٹراں ، نرساں ، پیرامیڈکس اتے سپورٹ اسٹاف کوں رلایا ویسی، وی کئیر پروگرام سارے صوبائی وزرائے صحت نال رل تے بنرایا گئے جیندے اچ صوبے ہتھ ونڈیندے پین، اے پروگرام صوبائی حکومتاں اتے ڈویلپمنٹ پارٹنرزدے کماں کوں اگونہا کرنڑ کیتے شروع کیتا ویندا پئے،مستقل اتے براہ راست بنیاداں تے ذاتی حفاظت دے سامان دی فراہمی پروگرام دا اہم حصہ اے ،ایں تربیت کیتے معیاری قومی نصاب بنڑایا گئے اتے پاکستان دیاں اعلی میڈیکل یونیورسٹیاں (ہر صوبے اچ ہک) کوں اپنڑے علاقیان اچ تربیت ڈیونڑ کیتے چنڑیا گئے۔ پروگرام کوں وزارت صحت ، یونیسف، عالمی ادارہ صحت اتے آئی سی آر سی دا وی تعاون اے۔ایں موقع تے تقریب اچ عالمی ادارہ صحت دے نمائندہ برائے پاکستان ڈاکٹر پلیتھا مہیپالا ، ہیلتھ سروسز اکیڈمی دے وائس چانسلر ڈاکٹر اسد حفیظ، شہید ذوالفقار بھٹو میڈیکل یونیورسٹی دے وائس چانسلر ڈاکٹر تنویر خالق، خیبر میڈیکل یونیورسٹی دے پروفیسر ارشد جاوید، آغا خان یونیورسٹی دے ڈین پروفیسر عادل حیدر، فاطمہ جناح میڈیکل یونورسٹی دے وائس چانسلر عامر زمان خان اتے کوئٹہ توں پروفیسر سکندر ریاض خان وی خطاب کیتے۔
