اسلام آباد۔14جولائی (اے پی پی):وزیراعظم عمران خان آکھیے جو ودھدی آبادی تے کھنڈدے شہراں کوں سامݨے رکھیندے ہوئیں منصوبہ بندی کرݨ دی لوڑھ اے ، اسلام آباد کیتے نواں ماسٹر پلان بݨایا ویسی ، وفاقی دارالحکومت کوں پورے ملک اچ مثال ہووݨا چاہیدے ، اسلام آباد اچ قبضہ مافیہ نال نبݨݨ اہم چیلنج اے۔اے ڳال انہاں ٻدھ کوں وفاقی دارالحکومت اسلام آباد اچ مختلف ترقیاتی منصوبیں دا سنگ بنیاد رکھݨ دی تقریب توں خطاب کریندے ہوئیں آکھی اے ۔ وزیراعظم آکھیے جو 1960 توں 2010 تئیں 50 سال اچ اسلام آباد شہر جتنا کھنڈیے ، مزید اتنا2010 دے بعد آلے 10 سال اچ کھنڈ ڳئے جیں دا مطلب اے ھے جو اسلام آباد شہر تکھے کھنڈدا پئے۔ جے اساں ویلھے دی ضرورت مطابق تبدیلیاں نہ کیتیاں تاں اسلام آباد اچ ٹریفک سودھے مختلف مسئلیں دا سامݨا کرݨا پوسی ۔ اسلام آباد اچ ساوا ختم تھیندا پئے اتے شہری نقل مکانی دے اثرات تکھے شہر کوں آپݨی وکیڑ اچ گھندے پئن۔ اساکوں ہݨ مستقبل دے تقاضیں کوں سامݨے رکھ تے منصوبہ بندی کرݨی ہوسی ۔وزیراعظم سی ڈی اے کوں سڑکاں دی تعمیر تے شاباش ݙتی تے آکھیے جو اسلام آباد اچ ٹریفک دا مسئلہ ودھݨ آلا اے ۔ نویاں ترائے سڑکاں دی تعمیر کرݨ نال اے مسئلہ حل کرݨ اچ مدد مل ویسی ۔وزیر اعظم آکھیے جو گزریل 20 سال اچ شہراچ درختاں دی تعداد اتے ساوے علاقے مکدے پئن تعمیرات ودھ ڳئن ۔ پراݨے ماسٹر پلان دی جاہ نواں ماسٹر پلان بݨاوݨ دی لوڑھ اے ۔ گرین ایریاز کوں بچاوݨ دی کوشش کیتی ونڄے تے خالی جہیں تے شجر کاری کیتی ونڄے ۔ وزیراعظم آکھیے جو اسلام آباد دی سنڄاݨ ایندا محل وقوع ، سبزہ و شادابی اتے سوہݨا موسم اے ۔ اسلام آباد اچ لندن جتنا مینھ وسدے ۔ اسلام آباد اچ ساوݨ دی شجر کاری پورے ملک کیتے مثال ہووݨی چاہیدی اے ۔
