اسلام آباد۔ 21 اگست(اے پی پی)سپریم کورٹ آف پاکستان ولوں بانی چیئرمین پی ٹی آئی دی 9 مئی دے واقعات بارے 8 مقدمات اچ ضمانت دیاں درخواستاں منظور تھیوݨ اتے پی ٹی آئی رہنماواں دی پریس کانفرنس تے ردعمل ڈیندے ہوئیں وفاقی وزیر اطلاعات و نشریات عطااللہ تارڑ آکھیا جو 9 مئی دے مقدمات دا حالی ٹرائل جاری اے، شادیانے وڄاوݨ آلیاں کوں پتا ہووݨا چاہیدے جو ضمانت اتے بریت اچ فرق ہوندے۔ پی ٹی آئی کولو قانونی کیسز دے حوالے نال کوئی ثبوت کائینی، انہاں دا ایجنڈا ختم تھی ڳئے، ہݨ انہاں کولو گالھ کرݨ کوں کڄھ کائینی ایں سانگے اے ضمانت تے اتنیاں خوشیاں منیندے پئن۔ وفاقی وزیر اطلاعات آکھیا جو 190 ملین پاؤنڈ کرپشن کہیں ملک دی تاریخ دا سبھ توں وڈا میگا کرپشن سکینڈل اے جیںدے اچ بانی چیئرمین پی ٹی آئی کوں باقاعدہ ثبوت اتے ٹرائل پورا تھیوݨ دے بعد 14 سال قید دی سزا سݨوائی ڳئی، ایں کیس اچ پی ٹی آئی عدالت کوں اے ݙساوݨ اچ ناکام رہی جو ارباں روپے ملک ریاض کوں کیہڑی مد اچ اتے کیہڑے جواز دے تحت ݙتے ڳئن۔ پی ٹی آئی ایں کیس اچ قانونی دلائل ݙیوݨ دی بجائے مذہب کارڈ استعمال کیتا اتے ریاست مدینہ دے ناں تے عوام کوں گمراہ کرݨ دی کوشش کیتی۔ انہاں آکھیا جو ایں کیس اچ سپریم کورٹ دا ہک فیصلہ آیا جیںدے اچ آکھیا ڳئے جو جرمانہ سیٹل تھی ڳئے، اے کیویں ممکن اے جو ارباں روپے حکومت پاکستان کوں آوݨے ہن، انہاں کوں ہک ٻئے جرمانہ اچ ایڈجسٹ کر ݙتا ونجے۔ ڄیکر اے اتنے ہی نیک ہن تاں بانی چیئرمین پی ٹی آئی اتے انہاں دی اہلیہ القادر یونیورسٹی ٹرسٹ کیوں بݨایا اتے ملک ریاض توں زمین کیوں گھدی؟ ایں دا ولدا وی عدالت دے اندرو نئیں ݙتا ونڄ سڳیا۔ وفاقی وزیر اطلاعات آکھیا جو انہاں پنڄ پنڄ قیراط دیاں انگوٹھیاں رشوت دے طور تے گھدیاں اتے فائلاں کوں پہیے لاوݨ سانگے پیسے وصول کریندے رہے۔ 190 ملین پاؤنڈ میگا کرپشن کیس وچ اے ڳالھ ثابت اے جو بند لفافے اچ کابینہ توں فیصلہ منظور کروایا ڳئے اتے ایں ویلھے دے وزیراعظم عمران خان آپݨی کابینہ کوں اے ݙساوݨ وی گوارا نہیں کیتا جو ایں لفافے اچ کیا اے، ایں ویلھے کابینہ دے کئی ارکان سوال چاتا ٻھل عمران خان انہاں کوں اوور رول کر ݙتا اتے آکھیا جو تہاݙا ایںدے نال کوئی سروکار کائنی، تساں صرف ایکوں منظور کرو۔ انہاں آکھیا جو 190 ملین پاؤنڈ کرپشن کیس اچ 14 سال دی سزا آپݨی جاہ تے موجود اے، ایں کیس اچ اے کہیں قسم دا دفاع نہیں کر سڳے۔ اے ڳالھ افسوسناک اے جݙاں تہاݙی 14 سال قید دی سزا تھی ونجے اتے ایںدے بعد ہک ضمانت ملݨ تے زور شور نال شادیانے وڄائے ونڄن۔ انہاں آکھیا جو سلمان اکرم راجہ ہک سینیئر وکیل ہن، انہاں دا ٻہوں احترام اے، اڄ جݙاں انہاں آکھیا جو اساڈی فتح تھئی اے تاں اے سمجھ توں ٻاہرو اے کیوں جو ضمانت تاں قاتل، ڈاکو اتے ہر قسم دے ملزم کوں وی مل ویندی اے۔ انہاں آکھیا جو 9 مئی دا حالی ٹرائل چلدا پئے، ایں ٹرائل منطقی انجام تے پڄݨے، اے صرف ہک ضمانت اے، فیصلہ نئیں۔ انہاں آکھیا جو شبلی فراز سودھا پی ٹی آئی دے ٻئے کئی رہنماواں کوں 9 مئی دے مقدمات اچ سزائیں تھئین، جݙاں انہاں کوں سزا سݨوائی ڳئی تاں او وی ضمانتاں تے ہن۔ انہاں آکھیا جو اڄ صرف ضمانت ملݨ تے اتنی خوشی منائی ویندی پئی اے جیڑھی سمجھ توں باہر اے، کیا بانی چیئرمین پی ٹی آئی اڄ بری تھی ڳئن؟ انہاں آکھیا جو بانی چیئرمین پی ٹی آئی زیرحراست ہین، 190 ملین پاؤنڈ کرپشن کیس اچ انہاں کوں سزا تھی چکی اے، جݙاں او قیدی ہن تاں ایں ضمانت نال کوئی فرق نئیں پوندا۔ انہاں آکھیا جو ٻہوں سارے مقدمات اچ تفتیشی ادارے پہلے توں گرفتار ملزم دی ضمانت تے زور نئیں ݙیندے، پراسیکیوشن ضمانت دا نہیں آھدی۔ انہاں آکھیا جو اڄ ملݨ آلی ضمانت تے شادیانے وجائے ویندیے پئن، انہاں کوں اے تک نئیں پتہ جو ضمانت اتے بریت اچ کیا فرق ہوندے۔ انہاں آکھیا جو اے ڳالھ ہر بندے کوں پتا اے جو 9 مئی دے واقعات دی منصوبہ بندی عمران خان کیتی، 9 مئی دے واقعات وی پوری قوم ݙٹھے۔ بانی چیئرمین پی ٹی آئی ایںدی پوری منصوبہ بندی کر تے ڳئن، زوم تے ہک میٹنگ تھئی جیںدے اچ پی ٹی آئی دے کئی رہنماواں ایں عمل دی مخالفت کیتی پر پی ٹی آئی پرتشدد راستہ اختیار کیتا۔ 9 مئی کوں جی ایچ کیو تے حملے کیتے ڳئے، شہیداں دیاں یادگاراں کوں مسمار کیتا ڳئے، ریڈیو پاکستان کوں ساڑیا ڳئے۔ اے سب کڄھ ہک مذموم سازش دے تحت بانی چیئرمین پی ٹی آئی دی ہدایت تے تھیا۔ دشمن وی ایں حد تک نئیں ڳئے جتنا عمران خان اتے انہاں دی جماعت ڳئی۔
.jpg)
