میانوالی۔11دسمبر(اے پی پی)وزیراعظم عمران خان آکھیے جو پاکستان دے فیصلے ایندے عوام دی چاہت دے مطابق ہی کیتے ویسن، مسلیاں دے حل کیتے ہر کہیں نال الاوݨ کوں تیار ہیں، ملک لٹݨ آلیاں کوں این آر او ݙیسوں نہ مفاہمت کریسوں، ڄیڑھی قوم وݙے ڈاکواں نال ڈیل کریندی اے تباہ تھی ویندی اے، ملک اچ قانون دی بالا دستی چاہندے ہیں، ویلھا چابت کریسی جو میں اپݨی قوم کوں مایوس نہ کریساں، ساݙے دور اچ غریباں اتے پسماندہ علاقیاں دی بہتری کیتے ریکارڈ کم تھیندا پئے، 3 چار مہینے اچ مہانڳ ڳھٹݨ لڳ ویسی، مارچ تئیں پنجاب اچ ہر۔ ٹٻر کوں صحت کارڈ مل ویسی۔ اے ڳالھ انہاں میانوالی اچ عوامی جلسے نال خطاب کریندے آکھی۔ انہاں آکھیا جو حکومت 62 لکھ توں ودھ نینگراں کوں اعلیٰ تعلیم کیتے 47 ارب روپے دے وظائف ݙیندی پئی اے، نینگر آندے بلدیاتی انتخابات دی تیاری کرن اتے انتخابات اچ ودھ حصہ ڳھنن۔ وزیراعظم آکھیا جیکر میں اڄ وزیر اعظم ہان تان ایندے اچ وݙا ہتھ میانوالی دا اے، میانوالی دے کم کر تے اتھو دے عوام دا قرض لہیساں۔ انہاں آکھیا جو ساݙی حکومت دے 5 سال پورے تھیسن تاں اے کلہی حکومت ہوسی جیندے اچ اتنی ریکارڈ ترقی تھئی ہوسی، کوشش اے جو پسماندہ علاقیاں تے ودھ توجہ ݙویجے، میانوالی، بلکسر اتے مظفرگڑھ سڑک دے ٻݨݨ نال مسافراں اتے مقامی لوکاں کوں وݙا فیدہ تھیسی اتے اے منصوبہ ݙیݙھ سال اچ مکمل تھیسی۔ وزیراعظم آکھیا جو مہانڳ پورے ڄڳ دا مسلہ اے، کرونا پاروں کاروبار مکݨ نال مہانڳ ودھیے، کڄھ مہینے اچ مہانڳ ڳھٹ ویسی، کوشش اے جو غریب طبقے کوں ودھ فیدہ ݙیووں، ایں سانڳے احساس، کامیاب پاکستان، کامیاب نوجوان، اپݨا گھر، صحت کارڈ ڄھیں مختلف پروگرام شروع کیتن۔ وزیراعظم آکھیا جو اساں ہر کہیں نال مل ٻیھ تے مذاکرات کرݨ چاہندے ہیں، بلوچستان، وزیرستان اتے سابق قبائلی علاقیاں دے مسائل وی ڳالھ مہار نال حل کریسوں بھل ملک اتے عوام دا مال لٹ تے ٻاھرو ڳھن آنڄݨ آلے لٹیریاں نال کوئی مک مکا نہ تھسی نہ کوئی وتھی ݙیسوں، پاک نبی کریم ﷺ دا حکم اے ڄیڑھی قوم وݙے ڈاکواں نال رل وںجے، رعایت ݙیوے او تباہ تھی ویندی اے، ہر مہذب معاشرے اچ چوراں دی چھیکڑی ڄاہ جیل ہوندی اے ڈیل نئیں، ساݙے ڄھیں غریب ملکاں اچ امیر اتے غریب کیتے ٻیا قانون اے، قانون دی بالا دستی نہ ہووݨ وی تباہی اے، اساں وی ریاست مدینہ دے اصولاں دے مطابق قانون دی حکمرانی اتے فلاحی ریاست دے بنیادی نظریاں سانڳے ملک کوں اڳو تے ڳھن ویسوں۔
