اسلام آباد۔11ستمبر (اے پی پی) وفاقی وزیر داخلہ محسن نقوی بابائے قوم قائداعظم محمد علی جناح دے 77 ویں وھیݨے تے انہاں دی عظیم جدوجہد کوں خراج عقیدت پیش کیتے۔ آپݨے پیغام اچ محسن نقوی آکھیا جو قائداعظم مسلمانان ہند کوں ہک نظریہ، شعور اتے خودمختار ریاست عطا کیتی، انہاں برصغیر دے مسلماناں کوں غلامی توں کڈھ تے ہک آزاد وطن دی منزل تئیں پڄایا۔ وزیر داخلہ موجب جناح دی شخصیت کردار دی بلندی، ڳالھ دی سچائی اتے عمل دی ہکسوئی دا ایجھا امتزاج ہئی جو تاریخ اچ گھٹ ہی ݙیکھݨ کوں ملدے۔ انہاں تھک محنت، ہمت اتے استقلال نال ہک قوم کوں منزل توں ہمکنار کیتا۔ وزیر داخلہ آکھیا جو قائداعظم ایجھا پاکستان چاہندے ہن جتھاں ہر فرد کوں انصاف، برابری اتے عزت حاصل ہووے، اقلیتاں دے حقوق دے حوالے نال انہاں دا موقف ریاستی اخلاقیات دی معراج ہئی جݙاں جو تریمتاں کوں انہاں قومی تعمیر دا بنیادی ستون قرار ݙتا۔ محسن نقوی آکھیا جو محمد علی جناح دے نزدیک قیادت دا اصل جوہر ذاتی مفاد توں اتے تھیندے ہوئیں قومی مفاد کیتے سوچݨا اے، او ریاست کوں عوام دی امانت سمجھدے ہن۔ انہاں آکھیا جو جناح دا پاکستان ہک منصف، باوقار، علم دوست، مساوات اتے آپت دے احترام اُتے قائم ریاست اے، 77 سال بعد وی انہاں دی سوچ اڄ ساݙے فیصلیں، اتے قومی وجود دا پیمانہ اے، ایمان، اتحاد اتے تنظیم جناح دی اصل امانت اتے ایہا پاکستان دی روح اے۔
.jpg)
