اسلام آباد۔13ستمبر (اے پی پی) وفاقی کابینہ پاکستان نال معاہدہ نہ رکھݨ آلے ملکاں ولوں سانجھی قانونی مدد دی درخواستاں قبول نہ کرݨ دی سمری منظور کر ڳھدی اے جڈانجو وزیراعظم وزارت خزانہ اتے سٹیٹ بینک آف پاکستان کوں ہدایت کیتی اے جو حجاج کرام دی اوور بکنگ بارے بینکاں توں اے ضرور پچھیا ونڄے تو انہاں ایں معاملے تے لاپرواہی کیوں کیتی اے۔ چھل متاثرین کیتی این ڈی ایم اے کوں ترائے ارب روپے ݙیوݨ دی وی منظوری ݙتی ڳئی۔ وزیر اعظم آفس میڈیا ونگ دے مطابق وزیراعظم شہباز شریف دی صدارت اچ وفاقی کابینہ دا اجلاس منگل کوں اسلام آباد اچ تھیا۔ وزیراعظم سارے کابینہ ممبران کوں خوش آمدید آکھیا۔ وفاقی کابینہ دے اجلاس اچ حکومتی کوٹے تے حجاج دی اوور بکنک دے معاملے تے انکوائری رپورٹ تے بحث کیتی ڳئی۔ ایں معاملے تے ٻݨائی ڳئی کمیٹی اچ وزارت خزانہ، وزارت مذہبی امور اتے سٹیٹ بینک دے نمائندے شامل ہن۔ اجلاس کوں ݙسیا ڳیا جو اووربکنگ دے معاملے اچ مفاہمت دے مسئلے ہن اتے کہیں قسم دی بدنیتی دے ثبوت نی ملیے۔ وزیراعظم وزارت خزانہ اتے سٹیٹ بینک آف پاکستان کوں ہدایت کیتی اے جو حجاج کرام دی اوور بکنگ بارے بینکاں توں اے ضرور پچھیا ونڄے تو انہاں ایں معاملے تے لاپرواہی کیوں کیتی اے۔ وفاقی کابینہ وزارت نیشنل ہیلتھ سروسز، ریگولیشنز اینڈ کوارڈینیشن ولوں ݙاہ دوائیں تے ریٹیل پرائس ودھاوݨ دی سمری مسترد کر ݙتی۔ وفاقی کابینہ وزارت سائنس تے ٹیکنالوجی دی سفارش تے چلݨ آلے پکھیاں کیتے ڳھٹ توں ڳھٹ انرجی پرفارمنس سٹینڈرڈ دی معیاد اچ 30 جون 2023 تئیں توسیع دی منظوری ݙے ݙتی۔ وفاقی کابینہ کابینہ کمیٹی برائے لیجیسلیٹو کیسز دی 2 ستمبر 2022 دے اجلاس اچ کیتے ڳئے فیصلیاں دی توثیق کر ݙتی جئین اچ بائیو سٹڈی رولز 2017 دے رول 13 اچ ترمیم دی منظوری،امیگریشن آرڈیننس دے سیکشن 15 اچ ترمیم دی منظوری، گیس چوری روکݨ اتے وصولی ایکٹ 2016 اچ ترمیم دی منظوری،سولر آلات،الیکٹرک موٹرز،پاور ٹرانسفارمر کوں پاکستان سٹینڈرڈ وکوالٹی کنٹرول اتھارٹی اچ شامل کرݨ شامل اے۔ وفاقی کابینہ اقتصادی رابطہ کمیٹی ای سی سی دے 8ستمبر دے اجلاس اچ کیتے ڳئے فیصلے دی توثیق کیتی۔
