اسلام آباد۔21اگست (اے پی پی) نائب وزیراعظم / وزیر خارجہ سینیٹر اسحاق ڈار آکھیے جو پاکستان اتے چین ݙو طرفہ اہم علاقائی اتے عالمی امور تے مکمل ہم آہنگی اتے اتفاق رائے رکھیندن، ساݙا مقصد ݙو طرفہ تعاون کوں مزید ودھارا ݙیوݨ اتے سی پیک کوں اڳلے مرحلے اچ گھن ونڄݨ اے۔ جݙاں جو چینی وزیر خارجہ وانگ ژی سی پیک کوں پاک۔چین سٹریٹجک سانجھ دی بنیاد قرار ݙتے اتے آکھیے جو موجودہ ترجیح سی پیک دی اُچی معیار دی ترقی اے۔ چھیویں سٹریٹجک ڈائیلاگ دے دوران ݙوہیں فریقین سی پیک کوں “گروتھ کوریڈور، عوامی فلاحی کوریڈور، گرین کوریڈور اتے اوپن کوریڈور” اچ اپ گریڈ کرݨ تے اتفاق کیتے۔ چین اتھاں منعقدہ چھیویں سٹریٹجک ڈائیلاگ دے دوران اپ گریڈ شدہ چین۔پاکستان اقتصادی راہداری (سی پیک) دی اُچی معیار دی ترقی کیتے آپݨے پکے عزم دی تجدید کیتی۔ ایں اجلاس دی صدارت نائب وزیر اعظم و وزیر خارجہ سینیٹر محمد اسحاق ڈار اتے چین دے وزیر خارجہ وانگ ژی کیتی ݙوہیں فریقین پاکستان۔چین تعلقات دے سارے پہلواں دا جائزہ ڳھدا اتے اہم علاقائی و عالمی امور تے ڳالھ مہاڑ کیتی۔ ایں موقع تے سی پیک دے ݙوجھے مرحلے تجارتی و اقتصادی تعلقات، کثیرالجہتی تعاون اتے عوامی رابطے سودھے کئی شعبیں تے تفصیلی ڳالھ مہاڑ کیتی ڳئی۔ چینی وزیر خارجہ وانگ ژی دے نال سانجھی پریس بریفنگ اچ سینیٹر اسحاق ڈار آکھیے جو ݙوہیں ملکاں وݙے ݙو طرفہ، علاقائی اتے عالمی معاملات تے مکمل ہم آہنگی اتے اتفاق رائے رکھیندن۔ انہاں آکھیا جو “وانگ ژی دا وژن چنڳا اے جیں اچ ݙو طرفہ تعاون کوں مزید ودھارا ݙیوݨ اتے سی پیک کوں اڳلے مرحلے اچ گھن ونڄݨ شامل اے۔ چینی وزیر خارجہ سی پیک کوں پاک۔چین سٹریٹجک سانجھ دی بنیاد قرار ݙتا اتے آکھیا جو موجودہ ترجیح سی پیک دی اُچی معیار دی ترقی اے۔ انہاں آکھیا جو چھویں سٹریٹجک ڈائیلاگ دے دوران ݙوہیں فریقین سی پیک کوں “گروتھ کوریڈور، عوامی فلاحی کوریڈور، گرین کوریڈور اتے اوپن کوریڈور” اچ اپ گریڈ کرݨ تے اتفاق کیتے۔ وانگ ژی آکھیے جو اساں محنت کریسوں تاں جو صنعتی، زرعی اتے معدنی شعبیں اچ تعاون کوں ودھایا ونڄ سڳے، پاکستانی عوام دی فلاح و بہبود بہتر بݨائی ونڄ سڳے، پاکستان دی خود مختار ترقی دی گنجائش کوں تکھا کیتا ونڄ سڳے اتے معیشت کوں مزید تکڑا بݨایا ونڄ سڳے۔ انہاں مزید آکھیے جو چین گوادر پورٹ دی ترقی و آپریشن اتے قراقرم ہائی وے ری الائنمنٹ منصوبے دی وی حمایت کریندے۔ ایویں انہاں ایم ایل۔1 (مین لائن ریلوے) منصوبے اچ تریجھے فریق دی شمولیت دا خیر مقدم کیتا۔ اسحاق ڈار آکھیے جو اے ڈائیلاگ پاک۔چین۔افغانستان وزرائے خارجہ دے ترائے ملکاں دے اجلاس دے بعد منعقد تھیا جیڑھا کابل اچ تھیا ہئی۔ انہاں آکھیا جو اے میکنزم ایں ڳالھ دا ثبوت ہن جو اساں خطے اچ امن، استحکام اتے خوشحالی دے ودھارے کیتے پرعزم ہن اتے پاک۔چین دوستی دے ثمرات خطے اتے ایں توں ٻاہرلے ملکاں دے نال ونڈݨ چاہندن۔ انہاں پاکستان دی خودمختاری، علاقائی سالمیت اتے قومی وقار دے تحفظ اچ چین دی پکی حمایت تے وی شکریہ ادا کیتا۔ نائب وزیراعظم آکھیا جو ݙوہیں فریقین کثیر الجہتی فورمز تے نیڑے دا تعاون جاری رکھݨ تے وی اتفاق کیتا، خاص کر اقوام متحدہ دی سلامتی کونسل (یو این ایس سی) اچ، جتھاں پاکستان ݙو سالہ مدت کیتے غیر مستقل رکن دے طور تے خدمات انجام ݙیندا پئے۔ انہاں آکھیا جواساں وزیراعظم شہباز شریف دے آندے دورہ چین دی تیاریاں تے وی ڳالھ مہاڑ کیتی، جتھاں او شنگھائی تعاون تنظیم (ایس سی او) دے سربراہی اجلاس اچ شرکت کریسن۔مزید اڳلے سال پاکستان اتے چین سفارتی تعلقات دے قیام دی 75 ویں سالگنڈھ منیسن جیں سلسلے اچ ݙوہیں ملکاں تقریبات منعقد کرݨ تے اتفاق کیتا۔ چینی وزیر خارجہ وانگ ژی آکھیا جو چین وزیر اعظم شہباز شریف کوں ایس سی او اجلاس کیتے گرمجوشی نال خوش آمدید آکھسی اتے ݙوہیں ملکاں آندے سال پاک۔چین سفارتی تعلقات دی 75 ویں سالگنڈھ دے سلسلے اچ سانجھی تیاری کریسن۔ انہاں پاکستان اچ زور دے مینھ پاروں تھیوݨ آلے ضیان تے افسوس کیتا اتے وختی تے ہنگامی انسانی امداد ݙیوݨ دا اعلان کیتا۔ ملک اچ دہشت گردی متعلق وانگ ژی پاکستان دی انتھک کوششاں دی تعریف کیتی اتے آکھیے جو چین کوں یقین اے جو پاکستان دی انسداد دہشت گردی دیاں کوششاں کامیاب تھیسن۔ انہاں آکھیا جو پاکستان موثر طور تے چین دے شہریاں اتے اداریں دی حفاظت کریندا پئے۔ ہک سوال دے جواب اچ اسحاق ڈار آکھیا جو پاکستان دی خارجہ پالیسی اچ کوئی تبدیلی نہ آسی، اے پالیسی سارے ملکاں دے نال دوستانہ تعلقات قائم کرݨ تے مبنی اے جو سانجھیاں قدراں، سانجھے احترام اتے مساوات تے قائم اے اتے عالمی امن و استحکام کیتے اے۔ انہاں آکھیا جوچین پاکستان دی خارجہ پالیسی دی بنیاد اے اتے اساں ݙو طرفہ تعلقات کوں مزید مضبوط بݨاوݨ کیتے پرعزم ہن۔ ہک ٻئے سوال دے جواب اچ وانگ ژی آکھیے جو چین دی بھارت دے نال سانجھ داری کہیں تریجھے ملک دے خلاف کائنی اتے نہ ہی کہیں ٻئے ملک تے ایں دا اثر پمسی۔ چینی وزیر خارجہ نے اسحاق ڈار کوں ہک فریم شدہ تصویر پیش کیتی، جیڑھا پاکستان دے دفترِ خارجہ اچ سولرائزیشن منصوبے دی تکمیل دی یادگار ہئی۔ ایں موقع تے چین دی وزارت خارجہ پاکستان دی وزارت خارجہ کوں دفتر خارجہ دی سولرائزیشن کیتے 20 لکھ یوآن (آر ایم بی) دا تحفہ ݙتا۔
