پاک فضائیہ پیشہ ورانہ مہارت وچ دنیا دی کہیں وی فضائیہ توں گھٹ کائنی، وزیراعظم شہباز شریف
اسلام آباد-7 ستمبر (اے پی پی) وزیر اعظم محمد شہباز شریف آکھیے جو اساکوں ماݨ اے جو پاک فضائیہ ایں ݙھاکیں وچ آپݨی پیشہ ورانہ صلاحیت اتے طاقت دے بے پناہ جوہر ݙکھیندے فضائی جنگی معرکیں وچ آپݨی دھاک ٻلہائی۔ اڄوکی تاریخ وچ پاک فضائیہ مسلح افواج دے نال رل تے آپریشن معرکہ حق بنیان مرصوص وچ فیصلہ کن کردار ادا کریندے جیں طرحاں دشمن کوں چارے شانے چت کیتا اوں پوری دنیا کوں حیران کر ݙتا، پاک فضائیہ پیشہ ورانہ مہارت وچ دنیا دی کہیں وی فضائیہ توں گھٹ کائنی ۔ اڄ دا ݙینھ پاکستان ایئر فورس دے اہلکاراں دی بہادری اتے قربانیاں دی یاد وچ منایا ویندے، خاص طور تے انہاں لوکاں دی جنہاں 1965 دی پاک بھارت جنگ دے دوران پاکستان دا دفاع کیتا۔ وزیر اعظم آفس دے پریس ونگ توں جاری بیان موجب وزیراعظم محمد شہباز شریف 7 ستمبر یوم فضائیہ دے موقع تے اپݨے پیغام وچ آکھیا جو ایں تاریخی ݙینھ تے میں پاک فضائیہ دے سارے بہادر سپوتاں اتے انہاں دی بے مثال کارکردگی کوں خراج تحسین پیش کرینداں۔ اڄ دے ݙینھ، میں پاک فضائیہ دے شہیداں کوں خراج عقیدت پیش کرݨ وچ فخر محسوس کریندا پیاں جنہاں دیاں نہ بھلݨ آلی قربانیاں تاریخ وچ روشن ہن، بے شک پاک فضائیہ دے بانی، بانی پاکستان قائد اعظم محمد علی جناح دے وژن موجب پاک فضائیہ دی اعلیٰ درجے اتے صف اول دے ادارے دے طور تے بنیاد رکھی جیڑھی سارے پیشہ ورانہ پہلواں تے معیاری کم جاری رکھیا ہویا اے اتے پیشہ ورانہ مہارت وچ دنیا دی کہیں وی فضائیہ توں گھٹ کائنی۔ انہاں آکھیا جو اڄ دا ݙینھ پاکستان ایئر فورس دے اہلکاراں دی بہادری اتے قربانیاں دی یاد وچ منایا ویندے، خاص طور تے انہاں لوکاں دی جنہاں 1965 دی پاک بھارت جنگ دے دوران پاکستان دا دفاع کیتا۔ انہاں آکھیا جو اے ݙینھ مناوݨ دا مقصد آوݨ آلیاں نسلاں کیتے لگن اتے بہادری دی علامت دے طور تے انہاں کوں قوم دی حفاظت دے عزم دی یاد ݙیویندے، اساکوں فخر اے جو پاک فضائیہ ایں ݙھاکیں وچ اپݨی پیشہ ورانہ صلاحیت اتے طاقت دے بے پناہ جوہر ݙکھیندے ہوئیں فضائی جنگی معرکیں وچ اپݨی دھاک ٻلہائی۔ اڄوکی تاریخ وچ پاک فضائیہ مسلح افواج دے نال رل تے معرکہ حق بنیان مرصوص وچ فیصلہ کن کردار ادا کریندے جیویں دشمن کوں چارے شانے چت کیتا اوں پوری دنیا کوں حیران کر ݙتا۔ بے شک پاک فضائیہ دی اے معیاری کارکردگی، بے باک قیادت، جنگجو سپوتاں دی ہنرمندی، اعلیٰ حکمت عملی اتے وݙے جنگی صلاحیتاں تے مؤثر عملدرآمد دا اظہار ہئی۔ اڄوکے سالاں دے دوران پاک فضائیہ دیاں نہ ہرݨ آلیاں کثیر الجہتی جنگی صلاحیتاں پاک فضائیہ دی جدت دا منہ ٻولیندا ثبوت ہن۔ وزیر اعظم شہباز شریف آکھیا جو میکوں ایں ڳالھ تے خصوصی فخر اے جو پاک فضائیہ آپݨی روشن تاریخی روایت کوں زندہ رکھیندے ہوئیں آپݨے توں کئی گنا وݙے دشمن کوں شکست ݙتی۔ پاک فضائیہ دے ساݙے ہیروز اپݨی بہادری نال ثابت کیتا جو دشمن کتنا ہی مضبوط اتے ہتھیاراں نال لیس کیوں نہ ہووے او کݙاہیں جذبے اتے ہمت کوں شکست نئیں ݙے سڳدا۔ اڄ دی پاک فضائیہ، انہاں بہادر سپوتاں کوں ہک جیندا جاڳدا خراج تحسین اے جنہاں آپݨیاں جاناں دا نذرانہ ݙے تے فضائیہ دی تاریخ رقم کیتی، میکوں یقین اے جو ہمیشہ وانگوں پاک فضائیہ ہر موقع اتے معیار تے پورا لہندیں ہوئیں اپݨے ملک دی خود مختاری، زمینی حداں اتے علاقائی سالمیت دا ہمیشہ پورا تحفظ کریندی رہسی
