اسلام آباد-6 ستمبر (اے پی پی) 50ویں بین الاقوامی سیرت النبی کانفرنس وچ مذہبی رہنماواں، علماء اتے اعلیٰ حکام فلسطین اتے کشمیر دے لوکاں دے نال پاکستان دی یکجہتی دا اعادہ کریندے اسلامی تعلیمات موجب سوشل میڈیا دے ذمہ وارانہ استعمال دی لوڑھ تے زور ݙتا۔ وزارت مذہبی امور اتے بین المذاہب ہم آہنگی دے زیر اہتمام کنونشن سنٹر وچ کانفرنس دا انعقاد کیتا ڳیا جیندا عنوان ’’سیرت النبی صلی اللہ علیہ وسلم دی روشنی وچ سوشل میڈیا دے مفید استعمال کیتے تعلیم ݙیوݨ وچ ریاست دیاں ذمہ واریاں‘‘ منتخب کیتا ڳیا۔ ایں موقع تے وفاقی وزیر تخفیف غربت و سماجی تحفظ پیر سید عمران شاہ آکھیا جو حضور نبی اکرم صلی اللہ علیہ وآلہ وسلم جہالت دے دور وچ دنیا کوں علم دی روشنی نال منور کیتا۔ انہاں ایں ڳالھ تے زور ݙتا جو سوشل میڈیا جدید زندگی وچ مرکزی حیثیت اختیار کر ڳئے مگر اوندے غلط استعمال دا مقابلہ صرف نبی صلی اللہ علیہ وسلم دی ہدایت تے عمل کر تے ای کیتا ونڄ سڳدے۔ انہاں مزید آکھیا جو سوشل پلیٹ فارمز تے نقلی خبراں اتے کردار کشی قرآنی اصولاں دی خلاف ورزی اے جیڑھی معلومات دی تصدیق دا مطالبہ کریندی اے۔ اسلامی نظریاتی کونسل دے چیئرمین ڈاکٹر محمد راغب حسین نعیمی ڈیجیٹل پلیٹ فارمز دے مواقع اتے خطرات تے روشنی ݙیندے آکھیا جو سوشل میڈیا دے منفی اثرات ہݨ اوندے مثبت استعمال توں کتھائیں ودھ ہن۔ انہاں ریاست توں مطالبہ کیتا جو او غلط معلومات اتے غلط استعمال کوں روکݨ کیتے قوانین نافذ کرے۔ مرکزی رویت ہلال کمیٹی دے چیئرمین مولانا سید عبدالخبیر آزاد مسلماناں تے زور ݙتا جو او سماجی برائیاں دے انسداد کیتے نبی کریمؐ دیاں تعلیمات تے عمل کرن۔ انہاں ملک دے دفاع وچ پاکستان دی مسلح افواج دیاں قربانیاں دی تعریف کریندے آپریشن بنیان مرصوص دے معرکہ حق وچ فتح کوں سچائی دی تاریخی کامیابی قرار ݙتا۔ پاکستان علماء کونسل دے چیئرمین حافظ محمد طاہر اشرفی زور ݙتا جو اسلام وچ غیر مصدقہ خبراں کھنڈاوݨ ممنوع اے۔ انہاں غلط معلومات دیاں مہم کوں دشمنان ولوں لوکاں اتے ریاست دے وچال دراڑ پاوݨ دیاں کوششاں نال جوڑیا۔ طاہر اشرفی فلسطین کیتے پاکستان دی نہ بدلݨ آلی حمایت دا اعادہ کریندے ہک آزاد فلسطینی ریاست دا مطالبہ کیتا۔ نائب صدر شیعہ علماء کونسل علامہ عارف واحدی سارے مسلکاں دے علماء کوں ہک پلیٹ فارم تے کٹھا کرݨ کیتے وزارت مذہبی امور و بین المذاہب ہم آہنگی دیاں کوششاں دی تعریف کیتی۔ انہاں آکھیا جو سوشل میڈیا دے ذریعے لسانی، فرقہ وارانہ یا صوبائی منافرت کوں ودھاوݨا اسلامی تعلیمات دی سنگین خلاف ورزی اے اتے ریاست کوں روکݨا چاہیدے۔ اجتماع وچ سفارت کاراں، مختلف مکاتب فکر دے علمائے کرام، مدارس و مکاتب دے طلباء اتے زندگی دے مختلف شعبیں توں تعلق رکھݨ آلے لوکاں شرکت کیتی اتے کانفرنس دے موضوع وچ وسیع عوامی دلچسپی کوں ظاہر کیتا۔
.jpg)
